جاستار مادەنيەت ۇيىندە «اق وتاۋ» وتباسى ورتالىعى» قوعامدىق بىرلەستىگىنىڭ ۇيىمداستىرۋىمەن «باقىتتى وتباسى» مەرەكەلىك شاراسى ءوتتى.
مەرەكەلىك شاراعا قالالىق ءماسليحات دەپۋتاتى.، ج. دوسمۇحامەدوۆ اتىنداعى پەداگگيكالىق كوللەدجدىڭ ديرەكتورى  شالقىما قۇرمانالينا قاتىسىپ، وتباسى قۇندىلىعى – مەملەكەتىمىزدىڭ تۇراقتى دامۋىنىڭ كەپىلى ەكەنىن اتاپ ءوتتى.

-اتا-انا - تاربيە  ونەگەسى، سوندىقتان «اتا كورگەن-وق جونار، انا كورگەن -تون پىشەر» دەپ  قازاق ماقالى تەگىن ايتىلماعان. وتباسىنىڭ باستى قازىعى، التىن دىڭگەگى - بالا. بالانىڭ تاربيەلى جان-جاقتى بولىپ وسۋىنە بەرەكەلى، ونەگەلى، ىنتىماقتى وتباسىنىڭ ىقپالى مول. قوعامىمىز ءۇشىن اسا ماڭىزدى ماسەلە -  وتباسىلىق قۇندىلىقتاردىڭ ساقتالۋى مەن دامۋى، وتباسى ابىرويىنىڭ ارتتىرۋ، ساپالى ۇرپاق ءوسىرۋ، وتباسىلىق مادەنيەتتى دامىتۋ. وسى ورايدا  ءوتىپ وتىرعان شارا بولاشاق ۇرپاق ءۇشىن ماڭىزدى،- دەدى شالقىما حايروللا قىزى.

 شارا بارىسىندا كۇمىس، التىن توي يەلەرى مەن جاڭا شاڭىراق كوتەرگەن جاس وتباسىعا قۇرمەت كورسەتىلىپ، وبلىس  باسشىسى التاي سەيدىر ۇلىنىڭ اتىنان قۇتتىقتاۋ حات تابىس ەتىلدى.
– باس قوسقانىمىزعا بيىل 51 جىل تولدى. بۇگىندە ماۋەلى بايتەرەكتەي تامىر جايىپ، ۇل-قىزىمىزدان تاراعان نەمەرە-شوبەرەلەرىمىزدىڭ قىزىعىن كورىپ وتىرمىز. جارتى عاسىر بىرگە، ءتاتۋ-تاتتى ءومىر ءسۇرىپ جاتقانىمىزدىڭ ەش سىرى جوق. باستىسى، ءار شاڭىراقتا بىرلىك، توزىمدىلىك پەن سىيلاستىق سالتانات قۇرۋى قاجەت. اتا-بابامىزدان قالعان ءسالت-داستۇردى ۇمىتپاي، ۇلكەندى سىيلاپ، كىشىگە ىزەت كورسەتىپ، ۇلاعاتتى ۇرپاق تاربيەلەسە، ەڭ ۇلگىلى وتباسى، مىنە، سول بولماق. بارشا قاۋىمدى وسىناۋ تاماشا مەرەكەمەن قۇتتىقتايمىز! – دەدى التىن توي يەلەرى مەرەكە جانە دامەن احمەتوۆتەر.
ءدال مەرەكەلىك شارا كۇنى شاڭىراق كوتەرگەن جاس جۇبايلار – نۇربول مەن ايگەرىم دە بۇل مەرەكەنى قولدايتىنىن، باقىتتى وتباسى – ەل بىرلىگى مەن تاتۋلىعىنىڭ نەگىزى ەكەنىن ايتتى. – ۇزاق جىل شاڭىراعىنىڭ وتىن وشىرمەي، وتا-سىپ كەلە جاتقان اعا بۋىن وكىلدەرىنە قاراپ، بوي تۇزەيمىز. التىن توي يەلەرىنىڭ بۇگىنگى قۋانىشى بىزگە دە جۇعىستى بولسىن. «بالالى ءۇي – بازار» دەگەن. كوپبالالى جانۇيا اتانىپ، ەلىمىزدىڭ دەموگرافيالىق احۋالىنا ۇلەسىمىزدى قوسامىز دەپ سەنەمىن. وتاۋ تىككەن كۇنىمىزدە وسىنداي قۇرمەتكە يە بولۋىمىزدىڭ ءوزىن جاقسىلىققا بالاپ وتىرمىز، – دەدى قالىڭدىق ايگەرىم.
سونداي-اق  شارادا 190 جىلدىق وتباسىلىق دارىگەرلىك ءوتىلى بار الىبايەۆتار اۋلەتى مەن ۇزاق جىل پەداگوگتىق قىزمەت اتقارعان پودولنىيلار جانۇيالارىنا قۇرمەت كورسەتىلىپ، كەش سوڭى مەرەكەلىك كونسەرتكە ۇلاستى.

گۇلىم اقاپ،

باتىس قازاقستان وبلىسى